Berriz ere hautaketa prozesuan gailentzen diren tokiko hamar talde eta azken urtean diskoa plazaratutako beste bost sartuko ditu egitarauan
Jaialdia 2016ko uztailaren 21etik 25era egingo da
51. Heineken Jazzaldiak azken urteotan euskal jazz taldeen alde egindako apustua berretsi du, 2016ko uztailaren 21etik 25era egingo den jaialdian parte hartzeko hainbat bide eskainita.
Hain zuzen ere, Heineken Jazzaldiko egitarauko 10 kontzertu hautaketa prozesu baten bidez sailkatutako hamar taldek eskainiko dituzte eta beste bost 2015ean diskoa plazaratutako beste bost taldek.
Horrez gain, jaialdiak euskal jazz musikarien beste proiektuak ere aukeratu ahal izango ditu. Iaz Josetxo Silguero izan zen zuzendarikidea, Pierre Jodlowskirekin batera, PUNKT Donostian izeneko kontzertuetako batean; Iñaki Salvador, Gonzalo Tejada eta Borja Barrueta partaide izan ziren beste proiektu interesgarri batean, Andrzej Olejniczak eta Maciej Fortuna poloniarrekin batera; Bullet Proof Lovers-ekoek Agertoki Berdean jo zuten; Sky Beats taldeak bi emanaldi eskaini zituen Kursaaleko Terrazetan; eta Euskadiko Ikasleen Jazz Orkestrako (EIJO) big bandak kontzertua eman zuen Kursaaleko Terrazetan ere.
2015ean 35 euskal bakarlari, talde eta DJek parte hartu zuten 50. Heineken Jazzaldiaren agertokietan.
Heineken Jazzaldiak beti egin izan die leku bere programazioan bertako taldeei, aurkezten zitzaizkion proposamenen artean aukeratuz, Hasier Oleagaren Cantus Caterva kasu, edota proiektu berriak bultzatuz: Iñaki Salvadorren Zilbor Hestea eta Te doy una canción, Gonzalo Tejadaren Ziklo 1 eta Ziklo 2, edota Bertsoa & Jazza, inprobisazioan oinarritutako bi kultur adierazpen garrantzitsuenak elkarrekin, jazzeko musika inprobisatua eta bertsolarien hitz inprobisatuak. 2012, 2013 eta 2014an, Euskal Herriko eta atzerriko musikarien arteko proiektuak sustatu zituen San Telmoko Gauak izenpean.
Tokiko taldeen hautaketa prozesua
51. Heineken Jazzaldiak tokiko 10 talde sartuko ditu programazioan.
Euskal jazz taldeen artean hautaketa prozesu bat aurrera eramateko ekimena 2006an jarri zen abian lehen aldiz, arrakasta handiarekin. Iaz, 40 talde inguru aurkeztu ziren eta horietatik 15ek Donostiako zenbait klubetan jo zuten, Heineken Jazzaldiaren Batzorde Antolatzaileak programan sartuko ziren hamar taldeak hauta zitzan. Ikus-entzule asko bildu ziren eta euskal jazz taldeen maila altua agerian geratu zen.
Hautaketa prozesuan parte hartzeko, taldeek Jazzaldiaren webgunean (www.heinekenjazzaldia.eus) hautaketa prozesu honetako oinarriekin batera zehazten den materiala (musika grabatua, dokumentazioa…) bidali beharko dute Heineken Jazzaldira, azaroaren 6a baino lehenago.
Jasotzen diren proposamen guztien artean, 51. Heineken Jazzaldiaren Batzorde Antolatzaileak 15 talde hautatuko ditu, aurkeztutako musikaren kalitatea eta Jazzaldiaren programazio estilora zenbateraino egokitzen diren kontuan hartuta. Hamabost talde horiek Donostiako klub eta lokaletan joko dute oraindik izendatu gabeko datetan (bat eguneko), 2015eko abendutik 2016ko apirilera bitartean. Joaldien datak eta lekuak hedabideei jakinaraziko zaizkie interesaturik legokeen entzuleriak joateko modua izan dezan.
Esandako emanaldien ondoren, Heineken Jazzaldiaren Batzorde Antolatzaileak, entzuleen erreakzioa kontuan harturik, azkenean programan sartuko diren hamar taldeak aukeratuko ditu.
Hautaketa prozesuan parte hartzeak ez du lehiaketa izaerarik izango: prozesuaren xede bakarra 51. Heineken Jazzaldian parte hartuko duten tokiko taldeak hautatzea izango da.
2015ean diskoa argitaratutako taldeak
2015ean CDa argitaratu duten tokiko jazz taldeek 51. Heineken Jazzaldian jotzeko aukera izango dute.
Antolakuntza Batzordeak bost talde hautatuko ditu aurkezten diren diskoen kalitatearen eta horiek duten interesaren arabera, eta horiek izango dira 51. Heineken Jazzaldian parte hartuko dutenak.
2015ean diskoa argitaratua izan eta 51. Heineken Jazzaldian parte hartu nahi duten taldeek 2015eko abenduaren 30a baino lehenago bidali behar dute diskoa jaialdiaren bulegoetara: Erregina Erregentea 8, 4. 20003 Donostia.
Deialdi hau ez da bateraezina tokiko 10 talde aukeratzeko prozesuarekin. Prozesu horretara aurkeztu den edozein taldek du aukera deialdi honetara ere aurkezteko, baldin eta 2015ean diskoa atera duela frogatzen badu.
