John Zornek jasoko du 2019ko Donostiako Jazzaldia Saria, Heineken Jazzaldiaren eskutik, jazz garaikidean izan duen eragin sakonagatik esker onez.
John Zorn musikagilea, instrumentista eta abangoardiako eszenaren katalizatzailea izan da, non balio eta eragin ikaragarriko ehunka musikari biltzen baitira. Ez dago gaur egun New Yorken egiten den jazza imajinatzerik Zornen orbitan mugitzen den musikariren batek esku hartu gabe.
John Zorn Donostian izango dugu berriro, Heineken Jazzaldian, 2013an bere Masada Marathon ikuskizunak lortutako arrakasta itzelaren ondoren. Oraingoan, Bagatelles Marathon dakarkigu, zeina arratsaldeko bi saiotan emango baita, Kursaal auditorioan: uztailaren 27an bata eta hurrengo egunean, 28an, bestea.
Zornek uztailaren 28an, igandea, 17:00ean, jasoko du Donostiako Jazzaldia Saria, agertokian bertan, bere bigarren kontzertuari ekin aurretik.
Musika-maratoi honetan 14 taldek hartuko dute parte John Zorn-en The Bagatelles musika-liburu berri eta luzeko 50 konposizio baino gehiagoren interpretazioan. Parte hartuko duten musikarien artean daude –hogeita hamarretik gora izango dira– Mary Halvorson, Marc Ribot, Kris Davis, Julian Lage, Dave Douglas, Joey Baron, Craig Taborn, Peter Evans, John Medeski, Ikue Mori, Erik Friedlander, Mark Feldman, Sylvie Courvoisier, Kenny Wollesen, Trevor Dunn eta Zorn-en sormen-unibertsoa oso ongi ezagutzen duten beste hainbat.
Donostiako Jazzaldia Saria
1994: Doc Cheatham
1995: Phil Woods
1996: Hank Jones
1997: Steve Lacy
1998: Chick Corea
1999: Max Roach eta Clark Terry
2000: Kenny Barron
2001: Ray Brown
2002: Elvin Jones
2003: Bebo Valdés
2004: Shirley Horn eta Fernando Trueba
2005: Keith Jarrett eta Charles Mingus (in memoriam)
2006: Herbie Hancock
2007: Wayne Shorter
2008: Ahmad Jamal
2009: Roy Haynes
2010: Ron Carter
2011: Toots Thielemans
2012: Jimmy Cobb eta Pierre Lafont (in memoriam)
2013: Lee Konitz eta Juan Claudio Cifuentes
2014: Toshiko Akiyoshi
2015: Benny Golson
2016: Ellis Marsalis
2017: Charles Lloyd
2018: Mary Stallings eta Michel Portal
