Village Peopleen disco musikaren erritmoek festa giroaz blaitu zuten Jazzaldiaren 58. edizioaren hasiera Keler Gunean. Izan ere, kontzertura bertaratutako milaka pertsonek abestu eta dantzatu zituzten talde estatubatuarraren kanta famatuak.
Yosuke Yamashita, pianista japoniarrak −datorren igandean, uztailak 23, Donostiako Jazzaldia Saria jasoko duenak− oraintsu argitaratutako Quiet Memories piano solo albumeko piezekin gozarazi zuen publikoa Skoda San Termo Museoko klaustroan eman zuen kontzertuan, Piano Solo zikloaren barruan; zikloa atzo hasi eta datozen lau egunetan jarraituko du.
Aurtengo Jazzaldian Kenny Barronen kontzertua izan zen Kursaal Auditorioan eskainitako lehena. Aurten egiten ari den biran, pianista eta konpositore hau bere karrerako pieza gailenenak interpretatzen ospatzen ari da bere 80. urtebetetzea, eta oraingo honetan Euskal Herriko Gazte Orkestrak lagunduta igo zen oholtzara.
Damir Imamović abeslari bosniarraren ahots iradokitzaileak eta Derya Türkan turkiarraren kemençeak estreinatu zuten Frigo Guneko agertokia, eta The Side Effects hirukote norvegiarra ere aritu zen bertan.
Fnac Gunean, berriz, Ill Considered eta Jerry Bergonzi Quarteten kontzertuez gozatu ahal izan zuten bertaratuek.
Sara Dowlingen kanturako dohainak liluratuta utzi zuen Frigo Guneko publikoa bere ahotsari darion berealdiko indar horrekin.
Nauticool bete eginda egon zen Arima Soul euskal taldearen kontzertuan. Bertan, euskaraz abestutako pieza propioak eta Soularen figura adierazgarrietako batzuen bertsioak interpretatu zituzten.
Fnac Forumak Ura Dúoren kontzertua hartu zuen, eta San Martin Merkatuan, berriz, Gonzalo Encinal & Fran Serrano aritu ziren giroa alaitzen.
Iago Magoa atzoko TxikiJazzaren protagonista izan zen Garberan.
Keler Gunean Fred Wesley & The New JBsek eman zioten azkena Jazzaldiaren lehenengo egunari, tronboia eta funk soinuak protagonista izan ziren kontzertu batean.